Gen 23 | BJR | STEP | Saráqa námmarifa 127 áukuana marasée kúqinau.

Genesis 23

Saráqa nammarifa kúqufanoo Abaraqaammáfa ákundara máqa feefaurú ufafa.

1 Saráqa námmarifa 127 áukuana marasée kúqinau. 2 Kannaana máqa máaqaki Qeebooroona máqusaki kuqufufanóo Abaraaqaammáfa miná kuqíranara soofaarí márinau.

3 Abaraqaammáfa narí ánaaqa kúqirana máfi quqásee Qeetana áiku ásauku máruqoo óonureenoo maaqí qímasee irámirinoo qinau. 4 Qinée moó máqannaasa ínni qámbaana ani máridaqa. Amanée qiní maqá moó qímifaqa feefaurú nimiséeqa qeeqá qínaaqa minakí ákundaanáuree.

5 Qeetana áiku ásuku irisée Abaraqaammána qímamiqa qiqau. 6 Anee maasá ufa íria, maasa aní qáfaunana anée afeeka rakisirafá márianafa máriananoo. Aneenná ánaaqa maasá ámiqira mádikaki ákundaa. Maasa aiqámausa mi madikánaki ákundaranara asasídaqa.

7 Miqí qufanóo Abaraqaammáfa misá nóorinni kummá rámafinoo qímanniminoo qinau. 8 Ínnee eedóo qiafaqá amanée ínnee Eefaroona, Sooqarana ámaaku irámirifánoo ínni nífusaa Makapeera máqa máaqaki narí anaadóo átinni óoni áamara márina qíminaqa feefaurú amana kái amiséeqee mi maqa maaqána qeeqáindi kámmásee qeeqá qíku qísauku níkundee márianauree.

10 Eefaroofa narí Qeetana áiku ásauku faqa faandaamura kooqíki ufa suqíranaki máridanoo iriséenoo aiqámausa irámirufanoo Abaraqaammána qímaminoo qinau. 11 Óo úriqararafa íria, qinee aiqáma mi maqána faqa óoni áamara minakí márina faqa aní ámianaura. Maaqóo qeeqá faiqi ánaasee nífusaa aní ámianana aneenná ánaaqa minakí ákundaa.

12 Miqí qufanóo Abaraqaammáfa Qeetana áiku ásauku nóorinni kummá rámafinoo Eefaroona aiqámausa íriaqeera firaaqóo qímaminoo qinau. 13 Amanée qinée irámiriananée írinnaree. Qinée mi maqána átisaa aiqáma feefauríanaura. Qinee feefaurú ámianana anee eedóo qímasee márainaqa qinee qeeqá qinaaqa miqóo ákundaanáura.

14 Eefaroonáfa minára iriséenoo maaqí qímasee Abaraqaammána qímaminau. 15 Óo úriqararafa, maqá feefaurú 400 siruáa máridanoo, mi feefaúruna maasá qeeqá qámbaana náqa fée másee raináanauree. Anee aneenná ánaaqa káqi minakí ákundaa. 16 Abaraqaammáfa iriséenoo eedóo qímaseenoo sikéera maraséenoo 400 qummaara ainaina dínni quqáseenoo siruáa dínni quqásoofanóo amana káì ufanóo áminau. Eefaroonáfa aiqámausa narí máqannaasa Qeetana áiku ásauku nífusaa qufanóo iriséenoo miqí kai minau. Nárì sikéera qummaara amana káì Eefaroona áminau.

17 Miqímmasee Abaraqaammáfa Eefaroona aiqáma áinaina Makapeeraa máqa máaqaki súani óosana qáannai Mámmareena maqúsa adeedí maruna feefaurúmmasoofanoo Abaraqaammánaindi kinau. Mi feefauriráfa maqá faqa óoni áamara minakí máruna faqa aiqáma sáqariuqa mi maqána átisaa máru saqarísa faqa aiqáma moodáanaki rafáaqafinau. 18 Aiqáma Qeetana áiku ásauku miqóo suqíranaki máriusa mi maqa maaqánara Abaraqaammánaindi fée qiqau. 19 Miqímmaseenoo Abaraqaammáfa narí ánaaqa Saráqa námmarina mi ooni aamáranaki Kannaana máqa máaqaki ákundanau. 20 Miqímmasoofanoo mi maqáfa faqa óoni áamara minakí márufa Qeetana áiku ásaukundi máriufa Abaraqaammánaindi kufanóo mi maqána níkundara máqaikinau.